Myrkdalen - den perfekte basen for en aktiv ferie!

Aktivitetar rett utanfor døra

Vil du helst la bilen stå heile ferien? I Myrkdalen kan du enkelt fylla dagane utan å forlata området.

Fjella rundt byr på varierte turstiar for både store og små - her kan du velja nye ruter kvar dag. Om du vil opp i fjellet utan å bruka krefter på høgdemeterane, tek Myrkdalsekspressen deg opp til 860 moh. på fem minutt. Derfrå kan du rusla innover til idylliske Mørkvesstølen - perfekt for ein lunsjpause eller eit friskt fjellbad på varme sommardagar.

Vil du høgare? Toppturen til Finnbunuten byr på storslått utsikt over fjord og fjell - ei oppleving du seint vil gløyma.

I Myrkdalen kan du leiga sykkel og utforska både dal og høgfjell på eigenhand - eller bli med på ein guida tur til den tradisjonsrike fjellgarden Vetlegrungen. Ønskjer du endå større vidder, er Vikafjellet berre ein sykkeltur unna. Der ventar spektakulært landskap og ro i sjela.

For små og store eventyrarar

Barna kan boltra seg i naturstien vår - full av oppgåver og spennande postar. For dei vaksne tilrår me stolpejakt, ein morosam og utfordrande måte å utforska nærområdet på.

Lyst til å læra noko nytt saman? Bli med på ein guida tur til lavvoen i Årmotslia, der du får høyra spennande historier om norske tradisjonar og friluftsliv.

Når regnet kjem...

Skulle vêret bli grått, er det ingen grunn til å sitja inne og kjeda seg. På Kamben Kafé & Spel kan du utfordra venner og familie i duckpin bowling og dart, eller du kan lena deg tilbake i vår Fjellsauna og nyta utsikta medan regnet trommar på taket.

Få opp pulsen - ta ein dagstur til Voss!

Berre 35 minutt med bil frå Myrkdalen finn du ekstremsportbygda Voss - staden for deg som vil kjenna adrenalinet pumpa!

Start dagen med å kjenna på korleis det er å fly hos Voss Vind. I vindtunnelen kan du oppleva fritt fall - heilt trygt og heilt vanvitig gøy!

Våt eller tørr? Vel utfordringa di!

Neste stopp: elva! Voss er kjend internasjonalt for dei spektakulære raftingselvane sine. Her får du rafting i verdsklasse. Heilt sant! Reiser du med barn? Fortvil ikkje, det finst familievennlege raftingsturar tilpassa små eventyrarar.

Liker du betre å halda deg tørr? Då kan du testa balansen og høgdekjensla i Voss Klatre- og Ziplinepark. Her finst utfordringar både for nybyrjarar og vidarekomne - i trygg høgd over bakken.

Besøk biletskjønne Flåm – eit fjordeventyr du seint vil gløyma!

Det er ikkje utan grunn at menneske frå heile verda drøymer om å oppleva Flåm. Og bur du i Myrkdalen, er du så heldig at denne bucketlist-destinasjonen berre ligg 45 minutt unna med bil!

Køyr heilt til Flåm, eller parker bilen i Gudvangen, berre 30 minutts køyretur frå Myrkdalen. Herfrå kan du ta Fjord Cruise gjennom den UNESCO-verna Nærøyfjorden - ei av dei vakraste fjordopplevingane i verda. Båten tek deg til Flåm, der eit hav av aktivitetar og serveringsstader ventar.

Tog, zipline og sykling - alt på alt på éin dag

I Flåm kan du oppleva ikoniske Flåmsbana, kjent som ei av dei mest spektakulære togreisene i verda. For ein dag fylt med opplevingar, kan du kjøpa ein pakke som inkluderer tog, Zipline og sykkeltur ned Flåmsdalen - perfekt for aktive familiar og eventyrlystne reisande.

Vikingliv og enkel retur

Om du parkerte i Gudvangen, er det enkelt å ta skyttelbuss tilbake etter turen. Og ikkje gløym å setja av tid til eit besøk i Vikingbyen i Gudvangen, der du kan oppleva korleis vikingane levde - heilt ned til minste detalj.

Køyr over vakre Vikafjellet og oppdag perla Vik!

Køyreturen over Vikafjellet er ei oppleving i seg sjølv - ein spektakulær fjellovergang med utsikt som tek pusten frå deg. Terrenget er eit eldorado for friluftsentusiastar, og spesielt fjelløparar har fått auga opp for det varierte og ville landskapet.

Vel framme i idylliske Vik ventar nye eventyr. Hos Vik Adventure kan du velja mellom to unike opplevingar på fjorden.

Bli med på ein guida fisketur, der lokale ekspertar tek deg med til dei beste fiskeplassane og delar av kunnskapen og kjærleiken sin til fjorden. Eller bli med på ein fartsfylt RIB-tur, der guidane viser deg dei vakraste fjordarmane på Sognefjorden - med fossefall, dramatiske klippar og bortgøymde perler du aldri ville funne på eiga hand.